ബൺ നിറച്ചത്
1.ബൺ നാലിഞ്ചു വട്ടത്തിലുള്ളത് – നാല്
2.ഇറച്ചി എല്ലില്ലാതെ – 350 ഗ്രാം
ഉപ്പ്, വെള്ളം – പാകത്തിന്
മുളകുപൊടി – ഒരു ചെറിയ സ്പൂൺ
മല്ലിപ്പൊടി – രണ്ടു ചെറിയ സ്പൂൺ
മഞ്ഞൾപ്പൊടി – കാൽ ചെറിയ സ്പൂൺ
3.എണ്ണ – രണ്ടു വലിയ സ്പൂൺ
4.സവാള – കാൽ കിലോ, പൊടിയായി അരിഞ്ഞത്
പച്ചമുളക് – അഞ്ച്, പൊടിയായി അരിഞ്ഞത്
ഇഞ്ചിയും വെളുത്തുള്ളിയും ചതച്ചത് – അര ചെറിയ സ്പൂൺ വീതം
മല്ലിയില പൊടിയായി അരിഞ്ഞത് – ഒരു വലിയ സ്പൂൺ
കറിവേപ്പില – ഒരു തണ്ട്
5.ഗരംമസാലപ്പൊടി – കാൽ ചെറിയ സ്പൂൺ
6.മുട്ട പുഴുങ്ങിയത് – നാല്
7.മുട്ട – രണ്ട്
പാൽ – രണ്ടു വലിയ സ്പൂൺ
നെയ്യ് – രണ്ടു വലിയ സ്പൂൺ
ഉപ്പ് – പാകത്തിന്
പാകം ചെയ്യുന്ന വിധം
ബൺ മുഴുവനോടെ എടുത്ത്‌, അടിയിൽ നിന്ന് ഒരിഞ്ചു വട്ടത്തിൽ ഒരു കഷണം മുറിച്ചു മാറ്റിവയ്ക്കുക. റൊട്ടിയുടെ ഉള്ളിൽ നിന്നുള്ള ഭാഗം സ്പൂണ്‍ കൊണ്ടു കോരി മാറ്റിവയ്ക്കണം.
രണ്ടാമത്തെ ചേരുവ യോജിപ്പിച്ചു വേവിച്ചു വെള്ളം വറ്റിക്കുക. ഇറച്ചി നന്നായി വെന്ത ശേഷം വാങ്ങി ചൂടാറുമ്പോൾ ഇറച്ചി പൊടിയായി അരിഞ്ഞു വയ്ക്കുക.
എണ്ണ ചാടാക്കി നാലാമത്തെ ചേരുവ വഴറ്റിയ ശേഷം ഇറച്ചിയും ഗരംമസാലപ്പൊടിയും ചേർത്തിളക്കണം. ഏതാനും മിനിറ്റ് ഇളക്കിയ ശേഷം വാങ്ങി വയ്ക്കുക.
ഈ ഫില്ലിങ്ങിൽ നിന്ന് അല്പം വീതം ഓരോ ബണ്ണിനുള്ളിലും വച്ച് ഓരോ മുട്ട പുഴുങ്ങിയതിന്റെ പകുതിയും വച്ച് കുറച്ചു ഫില്ലിങ് കൂടി വയ്ക്കുക. മുറിച്ചു മാറ്റിയ ഭാഗം തിരികെ വച്ച് അമർത്തണം.
ഏഴാമത്തെ ചേരുവ അടിച്ചു യോജിപ്പിക്കണം. ഈ മിശ്രിതം തയാറാക്കിയ ബണ്ണിൽ ബ്രഷ് ചെയ്ത ശേഷം ചൂടായ തവയിലിട്ടു ചുട്ടെടുക്കുക.
നെടുകെ മുറിച്ചു വിളമ്പാം.
