വാലന്റൈൻസ് ദിനത്തില്‍ ട്രാൻസ് വ്യക്തികളായ പ്രവീണിനും റിഷാനയ്ക്കും പ്രണയ സാഫല്യം. പാലക്കാട് എലവഞ്ചേരി സ്വദേശി പ്രവീൺനാഥും മലപ്പുറം കോട്ടയ്ക്കൽ സ്വദേശി റിഷാന ഐഷുവും ഒരുമിക്കുമ്പോൾ പൂർണ പിന്തുണയുമായി കുടുംബവും സുഹൃത്തുക്കളുമുണ്ട്. ട്രാൻസ് വ്യക്തികളായ ഇവരുടെ വിവാഹം ഫെബ്രുവരി 14, നാളെയാണ്.
പ്രവീണും റിഷാനയും പൊരുതി നേടിയതാണ് ഈ ജീവിതം. സ്വത്വം വെളിപ്പെടുത്തിയ കാലം മുതൽ വിവാഹം വരെയുള്ള ജീവിതം ഇരുവർക്കും അതിജീവനത്തിന്റെ നാളുകളായിരുന്നു. ആദ്യം വീട്ടുകാർ എതിർത്തെങ്കിലും തെരുവിലേക്ക് ഇറക്കിവിടാതെ ചേർത്തുപിടിച്ചു. ബോഡി ബിൽഡിങ് താരമായ പ്രവീൺ 2021ൽ, ട്രാൻസ്ജെൻഡർ വിഭാഗത്തിൽ മിസ്റ്റർ കേരളയായിരുന്നു.
2022ൽ മുംബൈയിൽ നടന്ന രാജ്യാന്തര ബോഡി ബിൽഡിങ് ഫൈനലിൽ മത്സരിച്ചു. നിലവിൽ സഹയാത്രികയുടെ അഡ്വക്കേസി കോ-ഓർഡിനേറ്ററായി പ്രവർത്തിക്കുന്നു. റിഷാന മിസ് മലബാർ പട്ടം സ്വന്തമാക്കിയിട്ടുണ്ട്. തൃശൂരിലെ സ്വകാര്യ സ്ഥാപനത്തിലെ ജോലിക്കൊപ്പം ഇഷ്ട മേഖലയായ മോഡലിങ്ങിനും ഇവര്‍ സമയം കണ്ടെത്തുന്നുണ്ട്.
