ജോലിയുള്ള വീട്ടമ്മമാർക്ക് പ്രാതൽ എന്തു തയാറാക്കും എന്നത് വലിയ ടെൻഷൻ അണ്. ഇഡ്ഡലിയോ ദോശയോ തയാറാക്കണമെങ്കിൽ തലേ ദിവസം അരിയും ഉഴുന്നും കുതിർക്കണം, അത് അരയ്ക്കണം പുളിക്കാൻ വയ്ക്കണം. ഇനി ആ പ്രയാസങ്ങൾ ഒന്നും വേണ്ട. ഇതാ ഇങ്ങനെ തയാറാക്കി നോക്കൂ.
ഇൻസ്റ്റന്റ് ഇഡ്ഡലി മിക്സ്
1.ഉഴുന്ന് – ഒരു കപ്പ്
2.വെളുത്ത അവൽ – അരക്കപ്പ്
3.അരിപ്പൊടി – രണ്ടു കപ്പ്
ബേക്കിങ് സോഡ – മുക്കാൽ ചെറിയ സ്പൂൺ
ഉപ്പ് – ഒരു ചെറിയ സ്പൂൺ
4.തൈര് – ഒരു കപ്പ്
വെള്ളം – പാകത്തിന്
പാകം ചെയ്യുന്ന വിധം
∙പാൻ ചൂടാക്കി ഉഴുന്ന് വറുക്കുക.
∙ഇതിലേക്ക് അവൽ ചേർത്തു അഞ്ചു മിനിറ്റ് വറുക്കുക. നിറം മാറാതെ നോക്കണം.
∙തണുത്തു കഴിയുമ്പോൾ മിക്സിയിൽ നന്നായി പൊടിച്ച് അരിച്ചെടുക്കണം.
∙ഇതിലേക്ക് മൂന്നാമത്തെ ചേരുവ ചേർത്തു നന്നായി ഇളക്കി യോജിപ്പിക്കുക.
∙ഒരു സിപ്പ് ലോക്ക് കവറിലോ വായു കടക്കാത്ത പാത്രത്തിലോ സൂക്ഷിക്കാം.
∙ഇഡ്ഡലി തയാറാക്കാൻ ഇതിൽ നിന്നും രണ്ടു കപ്പ് പൊടി എടുക്കുക.
∙ഇതിലേക്ക് നാലാമത്തെ ചേരുവ ചേർത്തു നന്നായി ഇളക്കി യോജിപ്പിക്കുക. ഇഡ്ഡലി മാവിന്റെ പാകത്തിനു വെള്ളം ചേർക്കണം.
∙ഉപ്പ് പാകത്തിനാക്കി അഞ്ചു മിനിറ്റ് മാറ്റി വയ്ക്കുക. ശേഷം ഇഡ്ഡലികൾ തയാറാക്കാം.