ജീവിത്തിലെടുത്ത വലിയൊരു തീരുമാനത്തെക്കുറിച്ച് ബിഗ്ബോസ് താരം ശാലിനി അടുത്തിടെയാണ് പ്രിയപ്പെട്ടവരെ അറിയിച്ചത്. താൻ വീണ്ടും വിവാഹിതയായെന്ന സന്തോഷവാർത്ത സോഷ്യൽ മീ‍ഡിയയിലൂടെ പങ്കുവച്ചപ്പോൾ നിരവധിപേർ ആശംസകളുമായെത്തി. ഇനിയങ്ങോട്ടുള്ള യാത്രയിൽ ദിലീപാണ് തനിക്ക് കൂട്ടെന്ന ശാലിനിയുടെ നിലപാട് ഒരേസമയം പല ചോദ്യങ്ങൾക്കും വഴിവച്ചു.
‘‘ഭർത്താവിന്റെ ആദ്യവിവാഹമാണോ?, വീട്ടുകാർ അംഗീകരിക്കുമോ? എന്നു തുടങ്ങി ചോദ്യശരങ്ങൾ തലങ്ങും വിലങ്ങുമെത്തിയിരുന്നു. ഇപ്പോഴിതാ എല്ലാം ചോദ്യങ്ങൾക്കും അടക്കം പറച്ചിലുകൾക്കും മറുപടിയുമായി എത്തുകയാണ് ശാലിനി.
ശാലിനിയുടെ വാക്കുകൾ ഇങ്ങനെ:
വിവാഹവിശേഷങ്ങൾ ചോദിക്കുന്നതിൽ കൂടുതൽ കേട്ടത്,, ‘‘ഭർത്താവിന്റെ ആദ്യവിവാഹമാണോ?, വീട്ടുകാർ അംഗീകരിക്കുമോ? ’’എന്നതായിരുന്നു. സ്വാഭാവികമായും പ്രതീക്ഷിക്കാവുന്ന ചോദ്യങ്ങളിൽ ഒന്ന് മാത്രം; അങ്ങനെയാണ് ഞാനതിനെ കണ്ടത്. ശരിയാണ് ഒരു കുഞ്ഞുള്ള വിവാഹമോചിതയായ പെൺകുട്ടിയെ വിവാഹം കഴിക്കുവാൻ വിവാഹിതനല്ലാത്ത ഒരാൾ മുന്നോട്ട് വരുമോ; ഇനി വന്നാൽ തന്നെയും കുടുംബം അംഗീകരിക്കുമോ, എന്ന് തുടങ്ങിയ സംശയങ്ങൾ സാധാരണ സമൂഹത്തിൽ പലർക്കും ഉണ്ടാവുന്നതാണ്.
സംരക്ഷിക്കാമെന്ന് വാക്കുകൊടുക്കുവാനും അബലയോട് സഹതാപം പങ്കുവയ്ക്കുവാനും നിരവധി പേർ മുന്നോട്ട് വന്നേക്കാം. കയത്തിൽ താണു പോവുമ്പോൾ കൈ തന്ന് ചേർത്ത് നിർത്തുവാൻ കഴിയുന്നവനാണ് പുരുഷൻ എന്ന് ഇന്നെനിക്ക് മനസ്സിലാവുന്നു. അദ്ദേഹത്തിന്റെ ആദ്യ വിവാഹമാണ്. വീട്ടുകാർക്കും നാട്ടുകാർക്കും സുഹൃത്തുക്കൾക്കും മുന്നിൽ 'എന്റെ ഭാര്യ' എന്ന് അഭിമാനത്തോടെ പരിചയപ്പെടുത്തുവാൻ അദ്ദേഹത്തിന് കഴിയുന്നു. ഒരു വർഷം മുൻപ് ചാനൽ പരിപാടിയിൽ ‘‘ശാലിനി ഇനി മറ്റൊരു ജീവിതത്തെ കുറിച്ച് ചിന്തിക്കുമോ’’ പ്രതീക്ഷകളൊന്നും ഉറപ്പുതരാതെ മുന്നോട്ടൊഴുകിയ ജീവിതത്തിൽ നിന്ന് ഇന്ന് ഈ കുടുംബം എന്നെ ചേർത്ത് നിർത്തുന്നു. ദൈവത്തിന് നന്ദി
എന്റെ ജീവിതവും ഒരു പൊളിച്ചെഴുത്താവട്ടെ. എവിടെയോ വായിച്ച ഒരു വാചകമുണ്ട്, ‘‘ഒരിക്കൽ ഉപേക്ഷിക്കപ്പെട്ടതിനെ മറ്റൊരാൾക്ക്‌ മനോഹരമായി സംരക്ഷിക്കുവാൻ കഴിയും’’, ശരിയാണ്, ആ സുരക്ഷിതത്വം ഞാൻ അനുഭവിക്കുന്നു.’’
ശാലിനിയുടെ രണ്ടാം വിവാഹമാണ് ഇത്. ആദ്യ വിവാഹത്തില്‍ ഒരു മകനുണ്ട്. തൃശൂർ വരവൂർ സ്വദേശിയാണ് ദിലീപ്. ജോലിയുമായി ബന്ധപ്പെട്ടു ദീർഘകാലമായി ഖത്തറിലാണ് അദ്ദേഹം.
ബിഗ് ബോസിനു ശേഷമനുഭവിക്കുന്ന സൗഭാഗ്യങ്ങളിൽ ഒന്ന് ഈ ജീവിതം. എങ്ങനെയൊക്കെയോ ജീവിച്ചു തീരുമായിരുന്ന ജീവിതത്തിൽ എന്റെ പ്രിയപ്പെട്ട നാട്ടുകാരോട് ഞാനെന്താണെന്നും കടന്നുപോവുന്ന സാഹചര്യങ്ങൾ എന്തൊക്കെയാണെന്നും തുറന്നു പറയുവാൻ ബിഗ് ബോസ് ഷോയിലൂടെ അവസരമൊരുക്കി തന്നു. ഇന്നു എന്നേക്കാൾ എന്റെ കുഞ്ഞും കൂടപ്പിറപ്പും അച്ഛനമ്മമാരും ഹാപ്പിയാണ്.
കൂട്ടിയും കുറച്ചും മാറ്റുരച്ചും ബന്ധത്തിന് വിലയിടാതെ അനിയന്റെ ഇഷ്ടത്തിനൊപ്പം നിന്ന ഏട്ടനും ഏട്ടത്തിയമ്മയും നാലുചുറ്റും കേൾക്കാൻ ഇടയുള്ളതൊന്നിനും ചെവി കൊടുക്കാതെ മകളായി മകന്റെ ഭാര്യയെ സ്വീകരിക്കാൻ മുന്നോട്ട് വന്ന അമ്മയും കൂടപ്പിറപ്പുകളുമാണ് ഈ ഫ്രെയ്മുകളിലുള്ളത്.
