മേക്കപ് ആർട്ടിസ്റ്റിന് അടുത്തെത്തുന്ന കല്യാണപ്പെണ്ണിനും ചെക്കനും ആദ്യം പറയാനുള്ളത് ഇതാണ്. ‘മേക്കപ് അധികം വേണ്ട.’ ഇതിനുത്തരമായി മേക്കപ് ആർട്ടിസ്റ്റിനു പറയാനുള്ളതോ, ‘മേക്കപ് മിതമാണോ അമിതമാണോ എന്നു ചിന്തിക്കേണ്ട. മേക്കപ് അണിഞ്ഞിട്ടുണ്ടെന്ന് ഒറ്റ നോട്ടത്തിൽ ആരും പറയില്ല.’
മേക്കപ് ഓവറാകുന്നതു ‘തിരഞ്ഞെടുപ്പി’ന്റെ പ്രശ്നം കൊണ്ടാണ്. ഫൗണ്ടേഷൻ, ഐ ഷാഡോ, ലിപ്സ്റ്റിക് എ ന്നിങ്ങനെ മേക്കപ്പിനായി ഉപയോഗിക്കുന്ന നിറങ്ങളുടെ തിരഞ്ഞെടുപ്പു തെറ്റുന്നത്, ഗുണമേന്മയുള്ള മേക്കപ് ഉൽപന്നങ്ങൾ തിരഞ്ഞെടുക്കാത്തത്, പരിചയസമ്പന്നരായ മേക്കപ് ആർട്ടിസ്റ്റിനെ തിരഞ്ഞെടുക്കുന്നതിൽ പാളിച്ച സംഭവിക്കുന്നത്, വിവാഹമടുക്കുമ്പോൾ എങ്ങനെയും ചർമപ്രശ്നങ്ങൾ പരിഹരിക്കണമെന്ന ചിന്തയിൽ തെറ്റായ സ്കിൻ ട്രീറ്റ്മെന്റുകൾ തിരഞ്ഞെടുക്കുന്നത്....
ശരിയായ തിരഞ്ഞെടുപ്പിൽ ശ്രദ്ധയൂന്നിയാൽ കല്യാണനാളിൽ ‘സുന്ദരി നീയും സുന്ദരൻ ഞാനും ചേർന്നിരുന്നാൽ...’ പാട്ടും പാടി ആരും കണ്ണുവയ്ക്കും വിധം കിടിലൻ കപ്പിൾ ആയി നിൽക്കാം. ഒപ്പം അറിഞ്ഞോളൂ ബ്രൈഡ് – ബ്രൈഡ് ഗ്രൂം മേക്കപ്പിലെ പുത്തൻ വിശേഷങ്ങളും.
ആളെ തന്നെ മാറ്റുന്ന മേക്കപ് മാജിക്കിനോടു പെൺകുട്ടികൾക്ക് യോജിപ്പേയില്ല. തന്റെ ചർമത്തിന്റെ നിറവും ഫേഷ്യൽ ഫീച്ചേഴ്സും എങ്ങനെയാണോ അവയെ മാറ്റിയെടുക്കാതെ തനതു ഭംഗിയിൽ ഹൈലൈറ്റ് ചെയ്യണമെന്നാ ണ് അവരുടെ ആഗ്രഹം. ഒന്നു നിർബന്ധമാണ്, മേക്കപ്പിന് പക്കാ ഫിനിഷിങ് വേണം.
മേക്കപ് ട്രെൻഡ് എന്താണ്?
വെഡ്ഡിങ് മേക്കപ്പിലെ പെണ്ണിഷ്ടങ്ങൾ മാറിക്കൊണ്ടേയിരിക്കും. ഈയടുത്ത കാലത്തായി എയർ ബ്രഷ് മേക്കപ്പും ഗ്ലാസ് സ്കിൻ മേക്കപ്പുമാണ് ട്രെൻഡ്.
എയർ ബ്രഷ് മേക്കപ് : ഭിത്തിയിൽ ബ്രഷ് ഉപയോഗിച്ചു ചായം പൂശുന്നതിലും ഫിനിഷിങ് സ്പ്രേ ചെയ്യുമ്പോൾ ലഭിക്കില്ലേ... അതു തന്നെയാണ് എയർ ബ്രഷ് മേക്കപ്പിന്റെ അടിസ്ഥാനം. മുഖത്തേക്ക് എയർ ബ്രഷ് ഗൺ ഉപയോഗിച്ചു ഫൗണ്ടേഷൻ നേർമയായി സ്പ്രേ ചെയ്യുന്ന രീതിയാണിത്.
ഗ്ലാസ് സ്കിൻ മേക്കപ് : കെ–ബ്യൂട്ടി നാട്ടിൽ ഹരമായതോടെ, ഗ്ലാസ് സ്കിന്നിനോട് മിക്ക പെൺകുട്ടികൾക്കും മോഹമാണ്. ജീവിതത്തിലെ ഏറ്റവും മനോഹരമായ ദിനത്തിൽ ആ മോഹത്തിന്റെ തിളക്കം വേണമെന്നും അവർ ആഗ്രഹിക്കുന്നു.
ഗ്ലാസ് മേക്കപ്പിനു വേണ്ടി പ്രത്യേകമായുള്ള പ്രൈമറും ജെല്ലും സെറ്റിങ് സ്പ്രേയുമുണ്ട്. ഇവയാണ് മേക്കപ്പിന് ഗ്ലാസ് തിളക്കം നൽകുന്നത്. ആദ്യം പ്രൈമർ അണിയും. അടുത്തപടിയായി ഫൗണ്ടേഷനുമായി യോജിപ്പിച്ച് ജെൽ അണിയും. ലിക്വിഡ് ബ്ലഷ് ആണ് ഭംഗി. ലിപ് മേക്കപ്പും നനവു തുളുമ്പും വിധം ചെയ്യുന്നതാണു നല്ലത്. അവസാന പടിയായി സെറ്റിങ് സ്പ്രേ കൂടി അണിയാം.
നോട്ട് ദിസ് മേക്കപ് പോയിന്റ്
ബ്രൈഡൽ മേക്കപ്പിൽ എടുത്തു പറയേണ്ട ഒന്നാണ് ഐ മേക്കപ്. കല്യാണപെണ്ണിന്റെ ഐ മേക്കപ് ഇപ്പോൾ ന്യൂട്രൽ ട്രെൻഡിലാണ്.
∙ ട്രെഡീഷനൽ വേഷമാണെങ്കിൽ പോലും ‘കണ്ണെഴുതുന്ന’ രീതി ഇപ്പോഴില്ല. കണ്ണിനു താഴെ ഇളം ബ്രൗൺ നിറത്തിൽ ഷേഡ് ചെയ്തുകൊടുക്കുകയാണ് പതിവ്. മൂക്കിനൊടു ചേർന്നു വരുന്ന കൺകോണിൽ ഷേഡ് നൽകാതിരിക്കുന്നതും ന്യൂട്രൽ ഐ മേക്കപ്പിന്റെ ഹൈലൈറ്റാണ്. എത്ര ചെറിയ കണ്ണും വിടർന്നു ഭംഗിയായിരിക്കാൻ ഈ മേക്കപ് സഹായിക്കും.
∙ചർമത്തിന്റെ നിറത്തോടു ചേർന്നു നിൽക്കുന്ന ഐ ഷാഡോ ആണ് അണിയുക. തിളക്കത്തിനായി ഉപയോഗിക്കുന്ന ഷിമ്മർ പോലും സ്കിൻ ടോണിനോടു ചേർന്നു നിൽക്കും. അപ്പോൾ കണ്ണുകള്‍ കൂടുതൽ മിഴിവുറ്റതാകും.
∙ കണ്ണിനഴകു നേടാൻ കൃത്രിമ കൺപീലികൾ നിർബന്ധമല്ല. അത്യാവശ്യം കട്ടിയുള്ള കൺപീലിയാണെങ്കിൽ ലാഷ് പ്രൈമറും മസ്കാരയും തന്നെ ധാരാളം.
∙ വീതിയുള്ള പുരികമാണ് ഭംഗി. അത് എത്ര സ്വാഭാവികതയോടെ ഇരിക്കുന്നുവോ മുഖം അത്രമേൽ തെളിച്ചമുള്ളതാകും. പുരികം ആകൃതിയിൽ വരച്ചു ഷേഡ് ചെയ്യുന്ന രീതി മാറി. ഐ ബ്രോ ജെൽ ഉപയോഗിച്ചു പുരികം ഭംഗിയാക്കിയാല്‍ ഇടതൂർന്ന വീതിയുള്ള പുരികം പലർക്കും നേടാനാകും.
∙ ഐ മേക്കപ് പൂർത്തിയാക്കിയ ശേഷം ഫൗണ്ടേഷനും മറ്റും അണിയുകയാണ് മേക്കപ്പിനു ഫിനിഷിങ് കിട്ടാൻ നല്ലത്. മുഖത്ത് പ്രൈമർ അണിഞ്ഞശേഷം കണ്ണുകൾ സുന്ദരമാക്കാം. ഐ മേക്കപ് ചെയ്യുമ്പോൾ ഐ ഷാഡോയും മസ്കാരയുമൊക്കെ മുഖത്തേക്കു വീഴാം. ഫൗണ്ടേഷൻ അണിയും മുൻപാകുമ്പോൾ ഇവ തുടച്ചുകളഞ്ഞ ശേഷം ഫൗണ്ടേഷൻ ഭംഗിയായി അണിയാം.
കല്യാണമുറപ്പിച്ചാൽ ഒരുങ്ങിക്കോളൂ
∙ ചർമത്തിന്റെ നിറം ഒരേ ടോണിലാക്കാൻ പരിചരണം തുടങ്ങാം. സൺടാനും പിഗ്‌മന്റേഷനും അകറ്റിനിർത്തിയാൽ തന്നെ ചർമത്തിന്റെ പാതി പ്രശ്നം അവസാനിച്ചു.
∙ ഹൈഡ്രേഷൻ നൽകുന്ന സ്കിൻ ട്രീറ്റ്മെന്റുകൾ ചെയ്യുന്നതു ചർമത്തിന്റെ ആരോഗ്യം വർധിപ്പിക്കും.
∙ ബ്ലാക് ഹെഡ്സ്, വൈറ്റ് ഹെഡ്സ്, മുഖക്കുരു എന്നിവ അകറ്റി നിർത്തുകയും വേണം.
വിവരങ്ങൾക്കു കടപ്പാട് : ജീന,
സെലിബ്രിറ്റി മേക്കപ് ആർട്ടിസ്റ്റ്,
ഹെയർ അഫയർ യൂണിസെക്സ് സലോൺ, കൊച്ചി
വിവാഹദിനത്തില്‍ വരനും വേണം മേക്കപ്
വിവാഹ ഫോട്ടോസ് കാണുമ്പോഴാണ് പല വരന്മാർക്കും മേക്കപ് ചെയ്യാഞ്ഞതിന്റെ നിരാശ തോന്നുന്നത്. മേക്കപ് ചെയ്ത്, മിന്നും സാരിയും ആഭരണങ്ങളും ധരിച്ച് അണിഞ്ഞൊരുങ്ങിയ പെണ്ണിനൊപ്പം നിൽക്കുമ്പോൾ കല്യാണച്ചെക്കൻ ആകെ ഡൾ. അതുകൊണ്ടു തന്നെ നമ്മുടെ പയ്യൻസ് എല്ലാം മേക്കപ്പിലും ഗ്രൂം ഗ്രൂമിങ്ങിലും ശ്രദ്ധ നൽകിത്തുടങ്ങി.
മേക്കപ് ട്രെൻഡ് എന്താണ്?
ചെക്കനിഷ്ടം മേക്കപ് ഇല്ലാത്ത മേക്കപ് ലുക് ആണ്. തികച്ചും സ്വാഭാവികമെന്നു തോന്നണം. എന്നാൽ കണ്ണാടിയിൽ നോക്കുമ്പോൾ ‘ഞാൻ പൊളിയാണല്ലോ’ എന്നു തോന്നുകയും വേണം.
മാറ്റ് ഫിനിഷ് മേക്കപ് : നാച്ചുറൽ ലുക് ആഗ്രഹിക്കുന്നതു കൊണ്ടു തന്നെ മാറ്റ് ഫിനിഷിങ്ങിനോടാണ് ആണുങ്ങൾക്കു പ്രിയം. എണ്ണമയം തെല്ലും തോന്നില്ല. ക്ലീൻ ലുക് ലഭിക്കുകയും ചെയ്യും. പ്രൈമറും ഫൗണ്ടേഷനും കൺസീലറുമെല്ലാം തന്നെ പുരുഷന്മാരെ മേക്കപ് അണിയിക്കുമ്പോഴും ഉപയോഗിക്കുന്നുണ്ട്. പക്ഷേ, ഇവ വളരെ കുറച്ച് അളവിൽ ആവശ്യമുള്ള ഭാഗത്തു മാത്രമാണെന്നു മാത്രം. മേക്കപ് ചെയ്യുമ്പോൾ കണ്ണിന്റെ ഭംഗിക്കായി കൺപീലികളിൽ ട്രാൻസ്പരന്റ് മസ്കാരയാണ് അണിയുക.
ഹൈഡ്രേറ്റിങ് മേക്കപ് : പുരുഷന്മാരുടെ ചർമം പൊതുവേ പരുക്കനാണ്. മിക്കവർക്കും ആ സ്വാഭാവികത നിലനിർത്തുന്നതാണു താൽപര്യവും. ഇനി അതല്ല, കല്യാണമല്ലേ മുഖത്തിനു തിളക്കം വേണ്ടേ എന്നാണു ചിന്തിക്കുന്നതെങ്കിൽ ഹൈഡ്രേറ്റിങ് മേക്കപ് തിരഞ്ഞെടുക്കാം. ചർമം ജലാംശത്തിന്റെ തിളക്കത്തിൽ ഫ്രെഷ് ആയിയിരിക്കും.
നോട്ട് ദിസ് മേക്കപ് പോയിന്റ്
മീശ, താടി, മുടി... ആണൊരുക്കത്തിൽ ശ്രദ്ധിക്കേണ്ട പ്രധാന കാര്യങ്ങളാണ് ഇവ.
∙ വിവാഹത്തിനു രണ്ടു ദിവസം മുൻപു മുടി വെട്ടാനും താടി മീശയും റെഡിയാക്കാനും നിൽക്കല്ലേ. ഒരാഴ്ച മുൻപു തന്നെ ഹെയർ കട്ടും ബിയേർഡ് ഗ്രൂമിങ്ങും ചെയ്യണം. മേക്കപ് ചെയ്യുന്ന സമയത്ത് അനുസരണയില്ലാതെ നിൽക്കുന്ന താടിയിലെയും മീശയിലെയും രോമങ്ങൾ ട്രിം ചെയ്തുകൊടുത്താൽ മതി.
∙ അണിയുന്ന വസ്ത്രങ്ങൾ കൂടി മനസ്സിൽ കണ്ടു വേണം ഹെയർ കട്ടും ബിയേർഡ് ഗ്രൂമിങ്ങും.
∙ അകാലനര ഉള്ളവർ കല്യാണത്തിനു മൂന്നു ദിവസം മുൻപ് മുടി കളർ ചെയ്തു നര മറയ്ക്കുക. തലേദിവസം ഹെയർ കളർ ചെയ്യാൻ നിൽക്കരുതേ...
∙ പുരികങ്ങളും ആരുമറിയാത്ത വിധം ആകൃതി വരുത്താം. അങ്ങിങ്ങായുള്ള അധികരോമങ്ങൾ നീക്കിയാൽ മതി.
∙ മേക്കപ് ചെയ്യുമ്പോൾ പുരികത്തിലെയും താടിയിലെയും മീശയിലെയും വിടവുകൾ നികത്താനാകും. മുടിയിഴകൾക്കു ഉള്ളു തോന്നിപ്പിക്കാൻ ഹെയർ ലൈൻ ഫിൽ ചെയ്തുകൊടുക്കുകയും ചെയ്യും.
∙ മേക്കപ് എല്ലാം കഴിഞ്ഞു സെറ്റിങ് സ്പ്രേ അടിച്ചു മേക്കപ് ഫിനിഷ് ചെയ്യുന്നതിനു റോസ് വാട്ടർ ഉപയോഗിച്ച് ബ്ലെൻഡ് ചെയ്തുകൊടുക്കാറുണ്ട്. ഇതു നാചുറൽ ലുക് കിട്ടാൻ സഹായിക്കും.
∙ നല്ല ഉറക്കം നല്ല മേക്കപ്പിന് ആവശ്യമാണ്. ചർമത്തിന് ആവശ്യത്തിനു വിശ്രമം ലഭിച്ചാലാണു ചർമത്തിന് ഉന്മേഷമുണ്ടാകുക. വിവാഹത്തലേന്ന് എട്ടു മണിക്കൂർ ഉറപ്പായും ഉറങ്ങാൻ ശ്രദ്ധിക്കുക.
കല്യാണമുറപ്പിച്ചാൽ ഒരുങ്ങിക്കോളൂ
∙ ഇതുവരെ സ്കിൻ കെയര്‍ റുട്ടീൻ ഒന്നും പിന്തുടർന്നിട്ടില്ലെങ്കിൽ ഒട്ടും വൈകാതെ തുടങ്ങിക്കോളൂ. മുഖം വൃത്തിയാക്കാൻ ക്ലെൻസർ, മുഖത്തിന് ഇണങ്ങുന്ന മോയിസ്ചറൈസർ, വെയിലിനെ തോൽപ്പിക്കാൻ സൺസക്രീൻ... ഈ മൂന്നു കാര്യങ്ങളെങ്കിലും ചർമപരിപാലനത്തിൽ ഉൾപ്പെടുത്തണം. രാവിലെയും രാത്രിയും സ്കിന്‍ കെയർ റൂട്ടീൻ പിന്തുടരണമെന്ന് ഓർക്കുക.
∙ മുഖക്കുരുവും താരനും അകറ്റാനുള്ള വഴി നേരത്തേ തന്നെ തുടങ്ങണം. കൃത്യമായ ഇടവേളയിൽ ട്രീറ്റ്മെന്റ് എടുത്ത് ഈ രണ്ടു പ്രശ്നങ്ങളേയും പരിഹരിക്കാനാകും.
∙ പെഡിക്യൂറും മാനിക്യൂറും ഉറപ്പായും വേണം. കൈകാലുകളുടെ വൃത്തി ആണിനും പെണ്ണിനും അഴകാണ്.
അമ്മു ജൊവാസ്
വിവരങ്ങൾക്കു കടപ്പാട്:
ബിന്ദു മാമൻ,
മേക്കപ് ആർട്ടിസ്റ്റ്, നാചുറൽസ്, ആലുവ
