പ്രപഞ്ച ശക്തിയാണ് പാർവതി. പ്രകാശിക്കുന്ന ,പ്രസാദിക്കുന്ന മഹാദേവനാണ് ശിവൻ. ശക്തിയും പ്രകാശവും ചേരുമ്പോൾ ശിവപാർവതി അനുഗ്രഹം .
മരുന്നിനോടൊപ്പം പ്രാർത്ഥനയും കൂടിയാകുമ്പോൾ രോഗം മാറിയ നിരവധി അനുഭവങ്ങൾ നമുക്ക് മുമ്പിലുണ്ട് . ശരീരത്തെ ബാധിക്കുന്ന രോഗം മനസ്സിനെയും വിഷമിപ്പിക്കും . പരസ്പരാശ്രിതമാണ് ശരീരവും മനസ്സും എന്ന് ആയുർവേദം പഠിപ്പിക്കുന്നുണ്ട് . ദൈവ വ്യപാശ്രയ ചികിത്സയെക്കുറിച്ചു ആയുർവേദ ഗ്രന്ഥങ്ങളിൽ വിവരണമുണ്ട് .
ഭക്തമഹാകവി പൂന്താനം, വസൂരി പിടിപെട്ടപ്പോൾ തിരുമാന്ധാംകുന്നിലമ്മയെ സ്തുതിച്ചുകൊണ്ട് , കേശാദി പാദം വർണ്ണിച്ചു 'ഘനസംഘം 'എഴുതിയത് പ്രസിദ്ധമാണല്ലോ .,
ദേവാരാധനക്കുപയോഗിക്കുന്നവക്കെല്ലാം ഔഷധ മൂല്യവും കൂടിയുണ്ട്. പൂക്കളായാലൂം ഇലകളായാലും നെയ്യ് ആയാലും പാലായാലും ഇളനീരായാലും മലരായാലും എല്ലാം ശരീര ശക്തിയെ നിലനിർത്താൻ സഹായകമായവയാണ് .
കൂവളത്തില , കറുക , തെച്ചിപ്പൂവ് , ചെമ്പരത്തിപ്പൂവ് , ശംഖുപുഷ്പം , താമര , വിവിധ തരം തുളസി , തുമ്പ , നന്ത്യാർവട്ടം , കരവീരം, എരിക്കിൻ പൂവ് എന്നിവയെല്ലാം ക്ഷേത്ര ആവശ്യത്തിന് , പൂജക്ക്‌ ഉപയോഗിക്കുന്നവയാണ് . ഇവക്കെല്ലാം ഔഷധ ഗുണവുമുണ്ട് .
കൂവളത്തില ശിവസ്വരൂപമാണ് . മുള്ളുകൾ ശക്തി സ്വരൂപം . ശാഖകൾ വേദ സ്വരൂപം . നീലകണ്ഠന് പ്രിയം കൂവളമാണ് . കൂവളത്തിന്റെ എല്ലാ ഭാഗവും ഔഷധമൂല്യമുള്ളതാണ് . ദക്ഷന്റെ യാഗം തകർത്ത ശിവന്റെ കോപാഗ്നിയാണ്‌ ഭൂമിയിലുള്ള ജനങ്ങളിൽ ജ്വരമായി പരിണമിച്ചതെന്ന് വാഗ്ഭടൻ രചിച്ച അഷ്ടാംഗഹൃദയത്തിലുണ്ട് . കൂവളത്തിന് പനി ,ചുമ ,ഛർദി ,ശ്വാസംമുട്ടൽ,
ശരീരത്തിലുള്ള വിഷം എന്നിവയെ ഇല്ലാതാക്കാനുള്ള കഴിവുണ്ട് . ഉദരരോഗങ്ങൾ , പ്രമേഹം എന്നിവയെ നിയന്ത്രിക്കുവാനും കൂവളത്തില നല്ലതാണ്. വില്വ൦ എന്ന് സംസ്‌കൃതത്തിൽ അറിയപ്പെടുന്ന ഇതിന്റെ ശാസ്ത്രീയ നാമം Aegle marmelos .കൂവളം അടങ്ങിയ പ്രധാന ഔഷധങ്ങളാണ് വില്വാദി ഗുളിക , വില്വാദി ലേഹം എന്നിവ . ശരീരത്തിലുള്ള വിഷാംശത്തിനെ ഇല്ലാതാക്കാനും വയറിളക്കം നിർത്താനും പനിക്കും നിർദ്ദേശിക്കുന്ന ഔഷധം. ചുമ ,ശ്വാസം മുട്ടൽ ,ഛർദി എന്നിവക്ക് ആശ്വാസമുണ്ടാക്കുന്നത് വില്വാദി ലേഹം.
കറുകമാലയാണല്ലോ ഉണ്ണിഗണപതിക്കു പ്രിയം . ദുർവ എന്ന് സംസ്കൃതനാമമുള്ള ഈ സസ്യം ചർമ്മ രോഗങ്ങൾ ,നാഡീരോഗങ്ങൾ ,മനോരോഗങ്ങൾ എന്നിവയിൽ പ്രധാനം . ശാസ്ത്രീയ നാമം Cynadon dactylon .ചർമ്മ രോഗങ്ങളിൽ നിർദേശിക്കുന്ന ദുർവാദികേര തൈലത്തിലെ പ്രധാന ചേരുവയാണിത് .
പാർവതിയുടെ ഇഷ്ടപുഷ്പമാണ് തെച്ചി (പാരന്തി .Ixora coccinea .) പ്രമേഹരോഗ നിയന്ത്രണത്തിന് ഉപയോഗിക്കുന്ന നിശാകതകാദി കഷായം ,ചർമ്മ രോഗങ്ങളിൽ ഉപയോഗിക്കുന്ന പാരന്ത്യാദി കേരതൈലം എന്നിവയിലെ പ്രധാന ഘടകം .
ഭഗവതിയുടെ പ്രിയ പുഷ്പമാണ് ചെമ്പരുത്തി .(ജപാകുസുമം .Hibiscus rosasinensis) . ത്വക് രോഗങ്ങൾ ,ഗർഭാശയ രോഗങ്ങൾ എന്നിവയിൽ ഗുണമുള്ളത് .കുട്ടികൾക്കുണ്ടാകുന്ന ചർമ്മ രോഗങ്ങളിലും തലമുടി വളരാനും പ്രയോജനപ്പെടുന്ന ചെമ്പരുത്യാദികേരതൈലം പ്രസിദ്ധം .
ദേവനും ദേവിക്കും അർച്ചന ചെയ്യാറുള്ള ശംഖുപുഷ്പം (Clitoria ternataea) ഓർമ്മക്കുറവ് , മനോരോഗങ്ങൾ , അപസ്മാരം , ശ്വാസംമുട്ടൽ എന്നിവയിൽ പ്രയോജനമുള്ളത് .ബുദ്ധിക്കും ഓർമ്മക്കും നല്ലതായിട്ടുള്ള നളദാദിഘൃതം, ബ്രഹ്മിഘൃതം എന്നിവയിൽ ശംഖുപുഷ്പം ഒരു പ്രധാന ചേരുവയാണ് .
വിഷ്ണുവിനും മഹാലക്ഷ്മിക്കും പ്രിയമുള്ള താമര (പങ്കജം -Nelumbo nucifera ) ക്ഷേത്ര ആരാധനയിൽ പ്രധാനപ്പെട്ടതാണ് . മനോരോഗങ്ങൾ , ശരീരം പുകച്ചിൽ എന്നിവയെ ശമിപ്പിക്കുന്നതും സൗന്ദര്യ സംരക്ഷണത്തിന് ഉപകരിക്കുന്നതുമാണ് താമരപ്പൂവ് . മനോരോഗങ്ങളിലും ചുട്ടു പുകച്ചിലിനും ഉറക്കമില്ലായ്മക്കും നിർദേശിക്കുന്ന വലിയ ചന്ദനാദി തൈലം ,സൗന്ദര്യ സംരക്ഷണത്തിന് ഉപയോഗിക്കുന്ന കുങ്കുമാദി തൈലം എന്നിവയിൽ താമരയുടെ ഭാഗങ്ങൾ ചേരുന്നുണ്ട്
കൃഷ്ണതുളസി ,രാമതുളസി , കർപ്പൂര തുളസി എന്നിങ്ങനെയുള്ള തുളസി വക ഭേദങ്ങൾ പൂജക്ക്‌ പ്രധാനം .
(തുളസി-Ocimum sanctum. ) തുളസിയുടെ ഗുണങ്ങൾ ഏവർക്കും അനുഭവസിദ്ധം . പനി , ചുമ ,ശ്വാസം മുട്ടൽ , വിഷ ഉപദ്രവങ്ങൾ എന്നിവയിലൊക്കെ തുളസി അടങ്ങിയ ഔഷധങ്ങൾ പ്രയോജനമുള്ളതാണ് .തുമ്മലിനും നീർവീഴ്ചക്കും ഉപയോഗത്തിലുള്ള തുളസ്യാദി തൈലം , പനിക്ക് ഉപയോഗിക്കുന്ന ശീതജ്വരാരി കഷായം എന്നിവയിലൊക്കെ തുളസി പ്രധാന ഘടകമാണ്.
വിഷമുള്ളതുകൊണ്ടു കരവീരത്തെ (Nerium olender ) ക്ഷേത്ര ആരാധനയിൽ നിന്ന് മാറ്റിയിട്ടൊന്നും ഇല്ല. തലമുടി വളരാൻ ഉപയോഗിക്കുന്ന മാലത്യാദി തൈലത്തിൽ കരവീരമുണ്ട്. വിഷമുള്ളവക്കും ഔഷധഗുണമുണ്ട് .
എരുക്കിൻപൂവ് (അർക്കം -Calotropis gigantea ) പൂജാപുഷ്പമാണ് .എരുക്ക് വിഷത്തെ ശമിപ്പിക്കുന്ന ഗുണമുള്ള ചെടിയാണ്. ശിവന്‌ വിഷഹരമായതാണല്ലോ വേണ്ടത്. ചർമ്മ രോഗങ്ങളിൽ ഫലപ്രദമായ ദിനേശവല്യാദി കേര തൈലം, വാതരോഗങ്ങളിലും നീരിലും പ്രയോജനപ്പെടുന്ന പ്രഭഞ്ജനവിമർദനം കുഴമ്പ് , വലിയ ചിഞ്ചാദി തൈലം എന്നിവയിൽ എരുക്ക് ഒരു ഘടകമാണ്.
നേത്രരോഗങ്ങളിൽ പ്രയോജനമുള്ള നന്ത്യാർവട്ടപ്പൂവ് (Tabernaemontana divaricata) പൂജാപുഷ്പമാണ് .
തുമ്പ (ദ്രോണപുഷ്പി -Leucs aspera ) ക്ഷേത്രത്തിൽ പൂജക്ക്‌ ഉപയോഗിക്കാറുണ്ട് . പനി , ഉദരരോഗങ്ങൾ , ശ്വാസകോശരോഗങ്ങൾ , ശിശുരോഗങ്ങൾ എന്നിവയിലൊക്കെ ഗൃഹഔഷധിയായിരുന്നു തുമ്പ.
ലോകത്തുള്ള ചെടികളെല്ലാം ഔഷധമൂല്യമുള്ളതാണ് .ഭഗവതിക്കും ദേവന്മാർക്കും പ്രിയമുള്ള പൂജാദ്രവ്യങ്ങൾ മനുഷ്യരുടെ ആരോഗ്യം സംരക്ഷിക്കുന്നവ കൂടിയാണ് .
