വേനൽച്ചൂടിനെ നേരിടാൻ വെള്ളം കുടിക്കേണ്ടത് അത്യാവശ്യമാണ്. അത് രുചിയും ആരോഗ്യവും നൽകുന്ന ഡ്രിങ്കുകളായാൽ കൂടുതൽ നല്ലതല്ലേ? കുട്ടികൾക്കും മുതിർന്നവർക്കും ഒരു പോലെ ഇഷ്ടമാകുന്ന നാലു സൂപ്പർ ഡ്രിങ്കുകളെ പരിചയപ്പെടാം. അവ എങ്ങനെ തയാറാക്കാമെന്ന് അറിയാം.
1. പൈനാപ്പിൾ ലെമണെയ്ഡ്
ചേരുവകൾ
പൈനാപ്പിൾ – അര കപ്പ്
തേൻ/ പഞ്ചസാര ആവശ്യത്തിന്
നാരങ്ങ - ഒരെണ്ണം
സബ്ജ വിത്തുകൾ – 1- 2 ടീസ്പൂൺ വെള്ളത്തിൽ കുതിർത്തത്
വെള്ളം - 2കപ്പ്
തയാറാക്കുന്ന വിധം
പൈനാപ്പിൾ രണ്ടു കപ്പ് വെള്ളം ചേർത്തു ജൂസ് ആക്കുക. അതിലേക്ക് നാരങ്ങ നീരും ആവശ്യത്തിനു പഞ്ചസാരയും കുതിർത്ത സബ്ജ വിത്തുകളും ചേർക്കുക. തണുപ്പോടെ വിളമ്പുക.
2. പച്ച മാങ്ങ ജ്യൂസ്
ചേരുവകൾ
പച്ച മാങ്ങ – ഒന്ന്. ഇടത്തരം വലിപ്പം
വെള്ളം - രണ്ടു കപ്പ്
തൈര് - മൂന്ന് ടേബിൾ സ്പൂൺ,
ചെറിയ ഉള്ളി - മൂന്നെണ്ണംഇഞ്ചി - ഒരു ഇഞ്ച് വലുപ്പം കറിവേപ്പില, പച്ചമുളക് – ആവശ്യമെങ്കിൽ
ഉപ്പ് - ആവശ്യത്തിന്
തയാറാക്കുന്ന വിധം
മുഴുവൻ ചേരുവകളും ഒന്നിച്ചു യോജിപ്പിക്കുക. നന്നായി അരിച്ചെടുത്തു തണുപ്പിച്ചു വിളമ്പുക.
3. ടെൻഡർ കോക്കനട്ട് സ്മൂതി
ചേരുവകൾ
ഇളം തേങ്ങ - ഒരെണ്ണം (കാമ്പും വെള്ളവും)
ഈന്തപ്പഴം, കുതിർത്ത ബദാം- 5 എണ്ണം വീതം
തേങ്ങാപ്പാൽ – അര കപ്പ്
ഏലയ്ക്ക - രണ്ടെണ്ണം
തയാറാക്കുന്ന വിധം
മുഴുവൻ ചേരുവകളും ഒന്നിച്ചു യോജിപ്പിച്ചു മിക്സിയിൽ അടിച്ചെടുത്തു തണുപ്പിച്ചു വിളമ്പുക.
4. വാട്ട് എ മെലൺ ഡ്രിങ്ക്
(What-a melon drink!)
ചേരുവകൾ
പാൽ – ഒരു കപ്പ് [ഇഷ്ടമുള്ള ഏതെങ്കിലും തരം പാൽ]
തണ്ണിമത്തൻ - രണ്ടു കപ്പ്
അലങ്കരിക്കാൻ – ഒരു കപ്പ് (തണ്ണിമത്തൻ സമചതുര ആകൃതിയിൽ മാറ്റിവയ്ക്കുക )
പഞ്ചസാര – രണ്ടു ടേബിൾ സ്പൂൺ
ഐസ് ക്യൂബുകൾ – ആവശ്യമെങ്കിൽ
തയാറാക്കുന്ന വിധം
പാൽ, തണ്ണിമത്തൻ, ഐസ് ക്യൂബ്സ്, പഞ്ചസാര എന്നിവ ഒരുമിച്ചു മിക്സിയിൽ അടിച്ചെടുക്കുക.
മുറിച്ചു വച്ചിരിക്കുന്ന തണ്ണിമത്തൻ ചേർക്കുക. ശേഷം തണുപ്പോടെ വിളമ്പുക.
അന്നു ഫ്രാൻസിസ്
ഡയറ്റീഷൻ
വി പി എസ് ലേക്ഷോർ ഹോസ്പിറ്റൽ, കൊച്ചി